Suriya ölkə ərazisində aşkar edilmiş nüvə materialını Atom Enerjisi üzrə Beynəxalq Agentliyin (AEBA) müşahidəsi ilə öz nəzarəti altında saxlayacaq.
Bu barədə Suriyanın XİN başçısı Əsəd əş-Şeybani AEBA-nın baş direktoru Rafael Qrossi ilə birgə mətbuat konfransında bildirib.
Qeyd olunub ki, bəyanat ötən həftə agentliyin Suriyada məxfi obyektdə saxlanılan nüvə materialını ölkədən çıxarmağı planlaşdırdığı barədə yayılan məlumatlar fonunda verilib.
"Biz bu materialların dinc məqsədlərlə emalı və təhlükəsiz saxlanması üçün lazımi şəraitin yaradılması üzərində işləyəcəyik", - əş-Şeybani deyib.
Qrossinin sözlərinə görə, Suriya hakimiyyəti öz təşəbbüsü ilə AEBA-ya ölkənin şimal-şərqindəki Deyr-əz-Zor əyalətində yerləşən nüvə obyektinə daxil olmaq imkanı yaradıb.
