Azərbaycan Respublikasının Baş naziri Əli Əsədov yanvarın 23-də Səudiyyə Ərəbistanı Krallığı Daxili İşlər Nazirliyinin Sərhəd Mühafizəsinin Baş direktoru Məhəmməd bin Abdullah Həmdan Al-Şəhri ilə görüşüb.
Nazirlər Kabinetinin mətbuat xidmətindən verilən xəbərə görə, görüşdə Azərbaycan ilə Səudiyyə Ərəbistanı arasında dostluq və qardaşlıq münasibətlərinin bütün sahələrdə uğurla inkişaf etdiyi vurğulandı.
Ötən ilin sonunda Bakıda keçirilmiş Azərbaycan Respublikası Hökuməti ilə Səudiyyə Ərəbistanı Krallığı Hökuməti arasında iqtisadiyyat, ticarət, investisiya, texnika, mədəniyyət, idman və gənclik sahələrində əməkdaşlıq üzrə Müştərək Komissiyanın 7-ci iclasının və Azərbaycan-Səudiyyə Ərəbistanı İnvestisiya Forumunun əhəmiyyəti qeyd edildi.
Ölkəmizdə sərhəd təhlükəsizliyinin gücləndirilməsi istiqamətində aparılmış islahatlar və əldə olunmuş nailiyyətlər barədə ətraflı məlumat verilib.
Görüşdə, həmçinin Azərbaycan və Səudiyyə Ərəbistanının sərhəd qurumları arasında əməkdaşlığın daha da inkişaf etdirilməsi perspektivləri müzakirə olunub.
Azərbaycan Respublikası Dövlət Sərhəd Xidmətinin rəisi Elçin Quliyev görüşdə iştirak edib.
.
