Paytaxtdakı yanğın hadisəsinin təfərrüatı məlum olub.
ARB TV xəbər verir ki, yanğın hadisəsi paytaxtın Xətai rayonu, Həzi Aslanov qəsəbəsi Qaçalov küçəsi 18 ünvanında yerləşən yaşayış binasında qeydə alınıb.
Təxminən gecə saat 3 radələrində binanın dam hissəsində başlayan alov, qısa müddətdə ətrafı cənginə götürüb. Onun tez yayılmasının səbəbi isə binanın qamışdan olmasıdır.
Əraziyə FHN-nin 10 dan artıq yanğınsöndürən maşını və 40-a yaxın canlı qüvvəsi cəlb edilib. Yanğının qarşısının operativ alınması üçün qərərgah yaradılıb.
48 nəfərin yaşadığı 12 mənzildən ibarət binanın dam örtüyü 500 kv.m sahədə tamamilə yararsız hala düşüb. Bir neçə mənzilə isə ciddi ziyan dəyib.
Sakin: "Yanğını görmədik, iyi hiss etdik. Birinci elə mən bilib nəvələrimi götürüb qaçaraq xəbər vermişəm. Camaat başladı çölə çıxmağa".
Sakin: "Yoldaşım qışqıraraq bina yanır, dur dedi. Əynimizə bir palto, bir ayaqqabı taxıb qaçdıq çölə. Heç nə çıxartmadıq".
Hadisə yerinə aidiyyatı qurumların nümayəndələri də gəlib. Məsələ nəzarətə götürülüb.
Razim Məmmədov - Xətai Rayon İcra Hakimiyyətinin başçısı: "Bunlar hamısı qəzalı binalardı və bizdə pilot layihədə var. Gələcək proqramda var ki, bunları söküb yerinə yeni layihəli binalar tikilsin".
Xətai rayonu ərazisində ümumilikdə qaməşdan tikilən və qəzalı vəziyyətdə olan 37 bina var. Yanan binayla yanaşı həmin tikililərdə pilot layihəyə daxil edilib.
Yenizaman.az
