Noyabrın 11-də Milli Məclisin sədri Sahibə Qafarova Böyük Britaniya-Azərbaycan parlamentlərarası əlaqələr üzrə dostluq qrupunun rəhbəri, Böyük Britaniya Parlamentinin İcmalar Palatasının üzvü Bob Bləkmənin başçılıq etdiyi nümayəndə heyəti ilə görüşüb.

Milli Məclisin Mətbuat və ictimaiyyətlə əlaqələr şöbəsindən verilən məlumata görə, qonaqları salamlayan spiker Sahibə Qafarova ölkələrimiz arasında strateji xarakter daşıyan münasibətlərin hazırda uğurla inkişaf etdiyini bildirib.

Ceyhun Bayramov fransalı həmkarı ilə görüşüb
Bəhruz Məhərrəmov: “Hansısa əyalət mollasının, generalın fikirləri Azərbaycanda gündəm yaratmamalıdır”
Qırğızıstan səfiri Mərkəzi Asiya və Cənubi Qafqaz ölkələrindən ibarət 5+3 formatının yaradılmasını təklif edib
O, qeyd edib ki, Böyük Britaniya Azərbaycanın dövlət müstəqilliyini tanıyan ilk ölkələrdən biridir və gələn il ölkələrimiz arasında diplomatik münasibətlərin qurulmasının 30-cu ildönümü tamam olacaq. İki ölkə arasında əlaqələrin müxtəlif sahələri əhatə etdiyini vurğulayan Milli Məclisin sədri xüsusilə iqtisadiyyat və enerji sahələrində uğurlu əməkdaşlığın həyata keçirildiyini diqqətə çatdırıb.

Spiker deyib ki, ölkələrimiz arasındakı əlaqələrin inkişafında parlamentlərimiz müsbət rol oynayır və qanunverici orqanlarımızın üzvləri arasında xoş münasibətlər mövcuddur. Bu, parlamentlərimiz arasında həm ikitərəfli, həm də çoxtərəfli formatda əməkdaşlıqda özünü göstərir. Hər iki ölkənin parlamentlərində İşçi qrupları uğurla fəaliyyət göstərir. Beynəlxalq təşkilatlar çərçivəsində də nümayəndə heyətlərimiz arasında qarşılıqlı təmas və müxtəlif məsələlərlə bağlı əməkdaşlıq mövcuddur. Qarşılıqlı səfərlər əlaqələrimizin daha da dərinləşməsinə xidmət edir. Britaniya Parlamentinin İcmalar Palatasının üzvü Bob Bləkmənin başçılıq etdiyi nümayəndə heyətinin Zəfər Günündən dərhal sonra ölkəmizə səfər etməsi bu qrupun 44 günlük Vətən Müharibəsi dövründə də ölkəmizin haqlı mövqeyinə verdiyi dəstəyin davamı kimi qiymətləndirilə bilər.

Bu günlərdə Azərbaycan xalqının 44 günlük Vətən müharibəsində əldə etdiyi Zəfərin birinci ildönümünü böyük təntənə ilə qeyd etdiyini xatırladan Sahibə Qafarova deyib ki, ötən il Azərbaycan Ali Baş Komandan İlham Əliyevin rəhbərliyi ilə Vətən müharibəsində tarixi qələbə qazanaraq, özünün ərazi bütövlüyünü və tarixi ədaləti bərpa edib. Azərbaycan bu qələbə sayəsində BMT Təhlükəsizlik Şurasının müvafiq qətnamələrini və digər beynəlxalq təşkilatlar tərəfindən qəbul olunmuş sənədləri öz gücü hesabına həyata keçirib. S.Qafarova xüsusilə vurğulayıb ki, hazırda münaqişə tarixdə qalıb və Azərbaycan işğaldan azad olunmuş ərazilərimizin bərpası ilə bağlı çox geniş tədbirlər həyata keçirir. O, xüsusilə diqqətə çatdırıb ki, Ermənistan 30 ilə yaxın işğal altında saxladığı bütün ərazilərmizi, şəhər və rayonlarımızı, yaşayış obyektlərini, infrastrukturu, tarixi, mədəni və dini abidələri tamamilə dağıdıb, talan edib.

Səmimi görüş üçün minnətdarlığını bildirən Böyük Britaniya-Azərbaycan parlamentlərarası əlaqələr üzrə Dostluq Qrupunun rəhbəri Bob Bləkmən ölkəmizin 44 günlük Vətən müharibəsində qazandığı qələbənin ildönümü ilə bağlı təbriklərini çatdırıb. O, Azərbaycanın öz ərazi bütövlüyünü bərpa etməsi ilə Cənubi Qafqazda yeni geosiyasi reallıq yarandığını bildirib. Bob Bləkmən ölkəsinin regionda daimi sülh və təhlükəsizliyin təmin olunmasında maraqlı olduğunu vurğulayıb.

O, ölkəmizə səfəri çərçivəsində nümayəndə heyətinin üzvləri ilə birlikdə işğaldan azad olunmuş Şuşa şəhərinə və Füzuli rayonuna səfər etdiklərini xatırladaraq, qeyd edib ki, həmin ərazilərdə törədilmiş dağıntıları öz gözləri ilə görüblər. Dostluq Qrupunun rəhbəri həmçinin Azərbaycanın həmin ərazilərdə həyata keçirdiyi bərpa və quruculuq işlərini də xüsusilə vurğulayıb.

Görüşdə çıxış edən Böyük Britaniya Parlamentinin İcmalar Palatasının üzvləri - Lord Con Kilkluney və Devid Duquid ölkələrimiz və parlamentlərimiz arasında münasibətlərin inkişafından danışıblar. Qeyd ediblər ki, ölkələrimiz arasında enerji sahəsində mövcud olan əməkdaşlıq iqtisadi sahədə əlaqələrin inkişafına əsaslı töfhələr verib. 1994-cü ilin sentyabrında "Əsrin Müqavilə"si imzalanan vaxtdan Britaniyanın "BP" şirkəti Xəzər dənizinin Azərbaycan sektorunda həyata keçirilən əsas neft-qaz layihələrinin əsas operatorlarından biri olmaqda davam edir. Qonaqlar həmçinin humanitar sahədə də əlaqələrin əhəmiyyətini qeyd edərək, təhsil sahəsində əməkdaşlığın uğurlu nəticələrini vurğulayıblar.

Qeyd edək ki, görüşdə Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov, Milli Məclisin deputatı Tural Gəncəliyev, parlament Aparatının rəhbəri Səfa Mirzəyev, Azərbaycanın Böyük Britaniyadakı səfiri Elin Süleymanov və digər rəsmi şəxslər iştirak ediblər.

Xatırladaq ki, Britaniya Parlamentinin İcmalar Palatasının üzvü və Azərbaycanla parlamentlərarası dostluq qrupunun rəhbəri Bob Bləkmənin başçılıq etdiyi parlament nümayəndə heyəti ölkəmizə səfəri çərçivəsində işğaldan azad olunan Şuşa və Füzuli şəhərlərində olub. 9 noyabr 2021-ci il tarixində Böyük Britaniya parlamentinin İcmalar Palatasında qondarma "erməni soyqırımı"nın tanınması ilə bağlı qanun layihəsinin birinci oxunuşda müzakirəyə çıxarıldığı vaxtda Dostluq Qrupunun üzvlərinin Şuşa şəhərində səfərdə olması qrupun bu mövzularda mövqeyini və Azərbaycanın haqlı mübarizəsinə dəstəyini aydın şəkildə təsdiqləyir.

.