"Bakı ilə Yerevan Dağlıq Qarabağ münaqişəsinin həllinə dair ən yüksək səviyyədə dialoqu davam etdirmək üçün prinsipial iradəyə malikdir”.
RİA "Novosti” xəbər verir ki, bunu jurnalistlərə ATƏT-in Minsk qrupunun rusiyalı həmsədri İqor Popov bildirib.
"Gələn ay iki ölkənin xarici işlər nazirləri arasında görüşün keçiriləcəyinə ümidvarıq. Həmin görüşdə problemin həlli üzrə başlıca məsələlər, həmçinin cari vəziyətin inkişafına, iki ölkə rəhbəri arasında münasibətlərin necə qurulacağına dair görüləcək etimadı artırma tədbirləri müzakirə olunacaq. Prinsipial məsələ odur ki, ən yüksək səviyyədə dialoqu davam etdirmək iradəsi var”, – rusiyalı diplomat vurğulayıb.
Xatırladaq ki, daha əvvəl ATƏT-in Baş katibi Tomas Qreminger Moskvadakı brifinqdə Dağlıq Qarabağ münaqişəsinin ATƏT ölkələrinin Xarici İşlər Nazirləri Şurasının dekabrın 6-7-də Milan görüşündə müzakirə olunması nəzərdə tutulduğunu bildirmişdi.
"Azərbaycan və Ermənistan qoşunlarının təmas xəttində vəziyyət az-çox sabitləşib".
Bunu da ATƏT-in Minsk qrupunun rusiyalı həmsədri İqor Popov deyib.
O, ATƏT-in Minsk qrupunun həmsədrlərinin regiona səfəri zamanı Azərbaycan və Ermənistan rəhbərliyi ilə bir sıra görüşlər keçirdiyini vurğulayıb.
"Dağlıq Qarabağ münaqişəsi ilə bağlı məsələlər diqqət mərkəzindədir. O cümlədən iki ölkənin liderləri arasında Düşənbədə baş tutan danışıqları, əldə edilmiş və hazırda həyata keçirilən razılaşmaları müzakirə etdik. Yerevanla Bakı arasında yaradılan kommunikasiya xəttindən danışdıq", - deyə İ.Popov bildirib.
