Prezident Administrasiyasının (PA) rəhbəri, akademik Ramiz Mehdiyev AzərTAc dövlət agentliyinə müsahibə verib.
R.Mehdiyev müsahibəsində ABŞ-ın Azərbaycandakı səfiri Riçard Morninqstarı sərt tənqid edərək amerikalı diplomatın "Azadlıq” radiosuna müsahibəsindəki fikirlərini şərh edib.
Yenizaman.az saytı bildirir ki, PA rəhbərinin mətni öncə rus dilində yayılan geniş müsahibəsində maraqlı mesajlar var.
R.Mehdiyev ABŞ səfirinin bir çox çərçivələri aşan bəzi fikirlərinə münasibət bildirərkən belə deyib: "Bizə "növbətçi təbəssüm” yox, səmimi tərəfdaşlar lazımdır”.
R.Mehdiyev səfirin çıxışını birtərəfli adlandıraraq bildirib ki, postsovet məkanında vəziyyətin kəskinləşməsində Qərbin günahı daha böyükdür. O, Morninqstarın nədən belə "qeyri-korrekt” danışdığını anlamadığını vurğulayıb və həmin müsahibədə səslənən fikirlərin diplomatik etiketə uyğun olmadığını söyləyib. Bunu ölkənin daxili işlərinə kobud müdaxilə adlandırıb.
R.Mehdiyev daha sonra deyib: "Səfir Morninqstar unutmamalıdır ki, Azərbaycan müstəqil dövlətdir, kiminsə müstəmləkəsi yox. Biz Azərbaycana qarşı hörmətsiliyə dözə bilmərik”.
PA rəhbəri vurğulayıb ki, Morninqstar ABŞ səfiri kimi olduğu ölkənin suverenliyinə hörmətlə yanaşmağa borcludur: "Yeri gəlmişkən, bu, bəzi Qərb dövlətlərin səfirlərinə də aiddir. Hansılar ki, Amerika səfirinin hərəkətlərinə uyğun olaraq hərəkət etməyə çalışırlar. Biz Azərbaycana qarşı hörmətsiz münasibətə dözmək niyyətində deyilik”.
R.Mehdiyev xatırladıb ki, Azərbaycan prezidenti İlham Əliyev Azərbaycan dövlətinə və xalqına saymazyana, hörmətsiz münasibətə dözmək niyyətində olmadığını dəfələrlə vurğulayıb: "Düşünürəm ki, amerikalı həmkarlarımız dövlətimizin rəhbərliyinin mövqeyi barədə məlumatlıdırlar. Əgər ABŞ səfiri heç nəyə məhəl qoymayaraq, Azərbaycanla bağlı bu cür kobud rəftara yol verirsə, deməli, onun statusu ilə bağlı ciddi problemləri var. Təəssüf ki, səfir Morninqstarın yolverilməz formada ölkənin daxili işlərinə qarışıb, diktə etmək səyləri ilk dəfə müşahidə olunmur. Bu, onun diplomat kimi peşəkarlığını böyük sual altına qoyur”.
R.Mehdiyev deyib ki, daha bir mühüm fakt səfirin Azərbaycanın qonşuları barədə səsləndirdiyi fikirlərlə bağlıdır: "Bu cür bəyanatlar açıq-aydın təxribatdır. Azərbaycan, üçüncü qüvvələrin arzularından asılı olmayaraq, qonşuları ilə mehriban qonşuluq siyasəti yürüdüb və həmişə də yürüdəcək. Dünyadakı hazırkı vəziyyət bizim addımlarımızın düzgün və səmərəli olduğunu bir daha sübut edir”.
PA rəhbəri səfirin müsahibəsinin tonunun qəbuledilməz olduğunu deyib: "Qeyd olunan müsahibənin kontekstinə əsaslanaraq deyə bilərəm ki, səfir həddini çox aşıb. O, özünü qışqıraraq Azərbaycanı idarə edən hansısa qubernator hesab edir”.
R.Mehdiyev bildirib ki, ABŞ mütəxəssisləri də daxil olmaqla bir çox tanınmış ekspertlər Vaşinqtonun müasir xarici siyasətində böhran elementlərinin açıq-aydın müşahidə olunduğunu qeyd ediblər: "ABŞ dövlət katibi cənab Kerrinin bu sahədə konseptual dəyişikliklərin zəruriliyi barədə bəyanatı deyilənləri sübut edir”.
PA rəhbəri hesab edib ki, Morninqstar dünyadakı yeni siyasi tendensiyaları duya bilməyib: "Aydındır ki, səfir Mornonqstarın və onun fəaliyyətinə birbaşa rəhbərlik edənlərin dünyagörüşü keçmişdə ilişib qalıb və zamanla təzad təşkil edir. Çünki çoxqütblü dünya müstəmləkə təfəkküründən imtina etməyə çağırır”.
.