Sülh və Demokratiya İnstitunun direktoru Leyla Yunusa qarşı cinayət işinin istintaqının yekunlaşması haqında ittiham aktı iyulun 2-də müdafiə tərəfinə təqdim olunub.
Bu haqda "Azadlıq" radiosuna Leyla Yunusun vəkili Elçin Qəmbərov məlumat verib. Vəkil deyib ki, yaxın 10 gün ərzində işlə bağlı məhkəmə prosesi başlayacaq. Elçin Qəmbərov iyulun 2-də Leyla Yunusla görüşüb.
Leyla Yunus və həyat yoldaşı Arif Yunus keçən ilin yayında həbs olunublar. Leyla Yunus dövlətə xəyanət və iqtisadi cinayətlərdə ittiham olunur. Arif Yunus isə dövlətə xəyanət və dələduzluqda təqsirli bilinir. Keçən ay istintaq onların işindəki dövlətə xəyanət maddəsini ayrıca icraata götürüb.
