Əlavə könüllü hasilatın azaldılmasında iştirak edən səkkiz “OPEC+” ölkəsi (Səudiyyə Ərəbistanı, Rusiya, İraq, BƏƏ, Küveyt, Qazaxıstan, Əlcəzair və Oman) hasilat cədvəlini dəyişdirmək və may ayında neft hasilatını sutkada 411 min barel artırmaq qərarına gəlib.
Bu barədə Yenizaman Neft İxrac Edən Ölkələr Təşkilatının (OPEC) rəsmi məlumatına istinadən xəbər verir.
Məlumata görə, davam edən sağlam bazar əsaslarını və müsbət bazar perspektivini nəzərə alaraq və 5 dekabr 2024-cü ildə razılaşdırılmış, sonradan 3 mart 2025-ci ildə yenidən təsdiqlənmiş qərara uyğun olaraq, gündəlik hasilatın azaldılması həcmini 2,2 milyon barelə tədricən və çevik qaytarılmasına başlamaq üçün aprelin 1-dən səkkiz iştirakçı ölkə gündəlik 411 min barel (öncə planlaşdırılandan 3 dəfə çox) hasilat düzəlişi həyata keçirəcək.
“Tədricən artımlar inkişaf edən bazar şərtlərinə uyğun olaraq dayandırıla və ya geri qaytarıla bilər. Bu çeviklik qrupa neft bazarının sabitliyini dəstəkləməyə davam etməyə imkan verəcək. Səkkiz “OPEC+” (OPEC və təşkilata daxil olmayan ölkələri əhatə edən neft istehsalının könüllü azaltması üzrə təşəbbüs) ölkəsi də qeyd edib ki, bu tədbir iştirakçı ölkələrə kompensasiyalarını sürətləndirmək imkanı verəcək”, - məlumatda qeyd olunur.
Səkkiz “OPEC+” ölkəsi bazar şəraiti, uyğunluq və kompensasiyaları nəzərdən keçirmək üçün aylıq görüşlər keçirəcək. Səkkiz ölkə iyunun 5-də hasilat səviyyəsinə dair qərar qəbul etmək üçün bir araya gələcək.
Qeyd edək ki, Azərbaycan da “OPEC+” razılaşmasının iştirakçısıdır.
.
