İyunun 2-4-də Bakıda keçiriləcək 30-cu Yubiley "Bakı Enerji Həftəsi" ("Baku Energy Week") Azərbaycanın enerji diplomatiyasında Macarıstanla əməkdaşlığı gücləndirəcək yeni platformaya çevrilə bilər.

Bu barədə Bolqarıstan KİV-i yazıb.

Bildirilir ki, bu tədbir Azərbaycanın qlobal enerji bazarındakı rolunu bir daha nümayiş etdirməklə yanaşı, rəsmi Bakı və Budapeşt arasında enerji əməkdaşlığının genişlənməsi üçün yeni imkanlar yaradacaq.

Macarıstan “Yaşıl Enerji Dəhlizi” layihəsində fəal iştirak etmək niyyətindədir. Aprelin 4-də keçirilmiş “Cənub Qaz Dəhlizi” Məşvərət Şurasının toplantısı çərçivəsində Azərbaycan, Gürcüstan, Türkiyə və Bolqarıstan arasında enerji ticarətinin inkişafı ilə bağlı razılıq əldə olunub.

Macarıstanın xarici işlər və ticarət naziri Peter Siyarto bildirib ki, bu təşəbbüs ölkəsinin enerji təchizatında Azərbaycanla əməkdaşlığı daha da gücləndirəcək.

Ötən il Azərbaycan, Gürcüstan, Bolqarıstan, Rumıniya və Macarıstan Qara dənizin altından elektrik xəttinin çəkilməsi üçün birgə müəssisə yaradıb. Layihə çərçivəsində Xəzər dənizindəki külək elektrik stansiyalarında istehsal olunan “yaşıl enerji”nin Gürcüstan üzərindən Rumıniya və Macarıstana ötürülməsi planlaşdırılır.

Bundan əlavə, Macarıstan Azərbaycandan qaz idxalını da artırmağa çalışır. Ötən ilin sentyabrında Macarıstanın “MOL” şirkəti (AÇG yatağında üçüncü ən böyük pay sahibi) ilə SOCAR arasında Şamaxı–Qobustan neft-qaz yatağında kəşfiyyat və hasilata dair Anlaşma Memorandumu imzalanıb.

Məqalədə qeyd olunur ki, Budapeşt Bakı ilə enerji əlaqələrini möhkəmləndirməklə enerji təhlükəsizliyini təmin etməyə və qaz idxalını şaxələndirməyə çalışır. Hazırda Azərbaycan qazı Türkiyə üzərindən nəql olunur, son mərhələdə isə 9,5 milyon əhalisi olan Macarıstana qazın çatdırılması “Serbiya–Macarıstan Qaz İnterkonnektoru” vasitəsilə həyata keçirilir.

"Beləliklə, rəsmi Bakı və Budapeşt həm də siyasi əlaqələri gücləndirməkdə davam edəcəklər. Onların Türk Dövlətləri Təşkilatına üzvlüyü bu prosesdə mühüm rol oynaya bilər. Eyni zamanda, onların xüsusilə əczaçılıq sektorunda iqtisadi əlaqələrin inkişafına diqqət yetirəcəkləri gözlənilir. Bununla belə, hələlik enerji onların əməkdaşlığının mərkəzi sütunu olaraq qalacaq", - deyə məqalədə qeyd olunub.

.