Xəzər dənizinin Neftçala sahilində naməlum kişi meyitinin tapıldığı barədə məlumat yayılıb.
APA-nın Mil-Muğan bürosunun xəbərinə görə, meyit Neftçala rayonunun ikinci Mayak kəndi ərazisində, sahildə aşkarlanıb.
Teleqraf.com-un əldə etdiyi məlumata görə, tapılan meyit 15 dekabr səhər saat 05:00 radələrində "Azneft" İB-nin N.Nərimanov adına Neft Qaz Çıxarma İdarəsinin 3 saylı Neft Yığım Məntəqəsinin estakadasının uçması zamanı itkin düşmüş neftçilərdən birinin meyitidir.
Tapılan meyitin şəxsiyyətinin müəyyənləşməsi üçün itkin düşən neftçilərin ailə üzvləri də dəvət olunub. O da qeyd edilib ki,hələlik həmin meyitin kimə məxsus olduğu bilinmir.
Xatırladaq ki, hadisə nəticəsində Neft Yığım Məntəqəsinin növbədə olan 5 nəfər və yaşayış budkasında olan 5 nəfər (cəmi 10 nəfər) əməkdaşı itkin düşüb. İtkin düşənlərdən birinin meyiti tapılıb.
Məsələ ilə bağlı Teleqraf.com-un sualını cavablandıran SOCAR mətbuat xidmətinin rəhbəri Nizaməddin Quliyev onlarda belə məlumatın olmadığını deyib.
Yaxın vaxtlarda Axtarış-xilasetmə Qərargahının rəsmi açıqlama verəcəyi gözlənilir.
.
