İranda prezidentliyə namizəd Möhsün Rezai digər namizəd - məhkəmə hakimiyyətinin rəhbəri İbrahim Rəisini seçkilərdə qələbə qazanması münasibəti ilə təbrik edib.
İSNA agentliyi verdiyi məlumata görə, İranda dünən keçirilən prezident seçkilərində 4 namizəd mübarizə aparıb.
Bunlar məhkəmə hakimiyyətinin rəhbəri İbrahim Rəisi, Möhsün Rezai, parlament sədrinin müavini Hüseyn Həzizadə Haşemi və islahatçı, Mərkəzi Bankın sabiq sədri Əbdülnasir Hümməti olub.
Hazırkı Prezident Həsən Ruhani seçkilərə qatılmayıb.
Ekspertlər seçkilərdə Ali dini lider Əli Xameneinin dəstəklədiyi İbrahim Rəisinin qələbəsini proqnozlaşdırırdılar.
13-cü çağırış İran prezident seçkilərində ilkin nəticələrə əsasən İbrahim Rəisi 17,8 milyon səs toplayıb.
Bunu İranın Seçki Komissiyasının sədri Camal Orf deyib.
C.Orfun sözlərinə görə, prezidentliyə digər namizəd Möhsün Rzayi 3,3 milyon səs toplayıb.
Əbdülnasir Hemmətiyə 2,4 milyon, Əmir Hüseyn Qazizadə Haşemiyə isə1 milyon seçici səs verib.
İran rəsmisi istifadə olunan bülletenlərin sayına əsasən 28,6 milyon nəfərin səsvermədə iştirak etdiyini deyib.
Qeyd edək ki, ötən gün (18 iyun) İranda 13-cü çağırış prezident seçkiləri keçirilib. Seçkilərdə prezidentlik uğrunda 4 namizəd – İranın Məsləhət Şurasının katibi Möhsün Rzayi, İranın Məhkəmə Sisteminin sədri İbrahim Rəisi, İran parlamentinin sədr müavini Əmir Hüseyn Qazizadə Haşemi və İranın Mərkəzi Bankının sabiq baş direktoru Əbdülnasir Hemməti rəqabət aparıb. 13-cü çağırış prezident seçkilərində 59,3 milyon seçicinin səsvermə hüququ var.
.
