Azərbaycanda siyasi partiyaların maliyyələşdirilməsi üçün gələn ilin dövlət büdcəsində 2,5 milyon manat vəsait nəzərdə tutulub. Qeyd edək ki, Milli Məclisdə təmsil olunan siyasi partiyalara vəsait "Siyasi partiyalar haqqında” Qanunun17-1-ci maddəsinə əsasən bölünür. Yəni dövlət büdcəsindən ayrılmış vəsaitin 10 faizi irəli sürdüyü namizədlər Milli Məclisə keçirilmiş son seçkilərdə etibarlı səslərin azı 3 faizini qazanmış, lakin parlamentdə təmsil olunmayan siyasi partiyalar arasında qazanılmış səslərin sayına proporsional olaraq bölünür. Vəsaitin 40 faizi Milli Məclisdə təmsil olunan siyasi partiyalar arasında bərabər, 50 faizi isə seçilmiş deputatlarının sayına proporsional olaraq bölünür.

Modern.azsaytının məlumatına görə, hazırda parlamentdə Ana Vətən Partiyasından (AVP) 1 deputat, Yeni Azərbaycan Partiyasından (YAP) isə 3 deputat yeri boşdur. Belə olan halda növbəti ildə büdcədən bu partiyalara ayrılan vəsaitin məbləğində dəyişiklik olacaqmı?
AVP sədri, deputat Fəzail AğamalıModern.az-a açıqlamasında bildirib ki, AVP-dən 1 deputat yerinin Milli Məclisdə boş qalması siyasi partiyanın maliyyələşməsi zamanı özünü biruzə verəcək.
"Bir deputat yerinin boşalması gələn il siyasi partiyaların maliyyələşməsi zamanı özünü biruzə verəcək. Bir deputat mandatına görə ildə partiyaya 11-12 min manat vəsait ayrılır. Zahid Oruc partiya sıralarından oktyabr ayında çıxarılıb. Ola bilsin ki, oktyabr, noyabr, dekabr aylarının da pulu – 3 min manatataək vəsait bizə verilməsin. Amma gələn ildən artıq partiyaya bu vəsait verilməyəcək”.
Qeyd edək ki, Zahid Oruc 9 oktyabr prezident seçkiləri ərəfəsində namizədliyini irəli sürdüyü üçün AVP-dən çıxarılmışdı.

YAP-ın 3 deputatından biri Gülər Əhmədova öz mandatından imtina edib, Hikmət Atayev yol qəzasında vəfat edib, Əli Əhmədov isə prezidentin sərəncamı ilə Baş nazirin müavini təyin edildiyi üçün avtomatik deputat səlahiyyətlərini itirib.
Bu isə o deməkdir ki, gələn il Milli Məclisdə təmsil olunan siyasi partiyaların maliyyələşdirilməsi zamanı hakim YAP təxminən 36 min manat itirəcək
2013-cü ilin dövlət büdcəsindən siyasi partiyaların maliyyələşməsinə 2,5 milyon manat ayrılıb.
Hazırda Milli Məclisdə təmsil olunan aşağıdakı partiyalar büdcədən maliyyələşir.

Yeni Azərbaycan Partiyası

Vətəndaş Həmrəyliyi Partiyası

Ana Vətən Partiyası

Sosial Rifah Partiyası

Azərbaycan Demokratik İslahatlar Partiyası

Ümid Partiyası

Bütöv Azərbaycan Xalq Cəbhəsi Partiyası

Vətəndaş Birliyi Partiyası

Böyük Quruluş Partiyası

Milli Dirçəliş Hərəkatı Partiyası

Ədalət Partiyası


.