Hazırda Azərbaycana gələn turistlərin sayı pandemiyadan əvvəlki sərhədlərin açıq olduğu vaxtlardakı qədərdir.
Bunu Dövlət Turizm Agentliyinin sədri Fuad Nağıyev bildirib.
"Hazırda ölkəmizdə karantin rejimi olduğu üçün quru yolla gələn turistlərimiz yoxdur, yəni turistlər yalnız hava yolu ilə gələ bilir. Qonşu ölkələrdən sərhədləri piyada keçərək gələn turistləri müvəqqəti olaraq itirmişik. Operativ Qərargahın quru sərhədlərinin açılması ilə bağlı qərarını gözləyirik. Quru sərhədlərin bağlı olması daxili turizmin artımına heç bir təsir göstərməyib. Bu amillər bir-biri ilə bağlı deyil", - deyə sədr vurğulayıb.
Fuad Nağıyev onu da bildirib ki, işğaldan azad edilmiş ərazilərdə turizmin inkişafı üçün MDB ölkələri, Türkiyə, İsrail və Rusiya ilə danışıqlar aparılır: "İşğaldan azad edilmiş ərazilər də daxil olmaqla turizmə investisiyaların yatırılması ilə bağlı həm yerli, həm xarici investorlarla danışıqlar aparırıq. Hələ ki, Şəki şəhərinə bir neçə investor maraq göstərir. Bunlar, müəyyən tarixi abidələrin bərpa edilib, işlənməsi ilə bağlıdır".
.
