Yanvarın sonu-fevralın əvvəllərində ölkə ərazisinə yağan qarın əriməsindən sonra bəzi sürüşmə sahələrində aktivlik yaranıb.
Yenizaman.az-ın məlumatına görə, Ekologiya və Təbii Sərvətlər Nazirliyinin Kompleks Hidrogeologiya və Mühəndis Geologiyası Ekspedisiyasının ekzogen geoloji proseslərin öyrənilməsi partiyasının rəisi Sadiq Əmiraslanov "Trend”-ə deyib ki, hazırda Lənkəran-Lerik, Quba-Xınalıq avtomobil yolundakı mövcud sürüşmə sahələrində aktivləşmə müşahidə olunur.
Lənkəran-Lerik avtomobil yolunda ən böyük sürüşmə sahəsi 17-ci km-dədir. Yolun 17-ci km-dən 53-cü km-nə qədər olan hissəsində 12-13 yerdə həm uçqun, həm sürüşmə sahələri var: "Demək olar ki, bütün yol boyu mövcud olan sürüşmə sahələrinin birində qismən az, birində qismən çox aktivlik müşahidə edilir. Ancaq ümumiyyətlə, bütün sürüşmə sahələrində aktivlik var. Təbii ki, qarın, yağışın bu sürüşmə, uçqun hadisələrinin aktivləşməsində rolu böyükdür. Ümumiyyətlə yağışdan, qardan sonra Yol İstismar İdarəsinin texnikaları həmişə o yolboyu işləyir. Hazırda yol normaldır, çox da qəzalı vəziyyətdə deyil".
.
