Asiya İnfrastruktur İnvestisiya Bankı (AIIB) təşkilatın növbəti prezidenti vəzifəsinə namizədlərin irəli sürülməsi prosesinə başlayıb.
AIIB xəbər verir ki, seçkilər Bankın İdarəçilər Şurasının 2025-ci il iyunun 24-dən 26-dək Pekində (Çin) keçiriləcək 10-cu İllik Toplantısı çərçivəsində keçiriləcək.
Namizədlər AIIB-nin regional üzvü olan ölkələrin vətəndaşları ola bilər. Onlar bankın idarəçiləri tərəfindən irəli sürülür.
Bu, AIIB tarixində üçüncü prezident seçkisidir. Hazırkı prezident və təşkilatın təsisçilərindən biri olan Tszin Litsyun ikinci səlahiyyət müddətini 2026-cı il yanvarın 15-də başa vuracaq.
AIIB 2016-cı ildə fəaliyyətə başlayıb. Hazırda onun 110 təsdiq edilmiş üzvü və 100 milyard ABŞ dolları həcmində nizamnamə kapitalı var.
Bankın Azərbaycanla əməkdaşlığı onun fəaliyyətinin ilk ilindən başlayıb. Tərəfdaşlığın əsas sahələrinə iqtisadiyyatın şaxələndirilməsi və davamlı inkişafın əsas amilləri kimi nəqliyyat, energetika və şəhər inkişafı daxildir. Mühüm birgə layihələrdən biri 2016-cı ildə Trans-Anadolu Təbii Qaz Boru Kəmərinin (TANAP) maliyyələşdirilməsi olub.
Yarandığı gündən AIIB Mərkəzi Asiya və Qafqaz regionuna fəal şəkildə investisiyalar yatırır. Özbəkistan, Qazaxıstan, Tacikistan, Qırğızıstan və Qafqaz ölkələrində təsdiqlənmiş layihələrin ümumi həcmi 5,5 milyard ABŞ dollarını ötüb. Növbəti illərdə regionun inkişafına təxminən daha 4,5 milyard ABŞ dolları ayrılması nəzərdə tutulur.
.
