İndi Avropa Müdafiə İttifaqının qurulmasının əsl vaxtıdır.
Bunu Avropa Komissiyasının (AK) rəhbəri Ursula fon der Lyayen Avropa Parlamentinin Plenar iclasında çıxışı zamanı deyib.
O bildirib ki, Ukraynaya müqavimət göstərməsi və qalib gəlməsi üçün lazım olan hər şey verilməlidir:
"Bu, gələcəyimiz üçün əsas seçim etmək deməkdir. Onilliklər ərzində ilk dəfədir ki, azadlığımız təhlükə altındadır. Avropa vətəndaşlarımızı qorumaq üçün lazım olan hər şeyi etmək bizim məsuliyyətimizdir. İndi Avropa Müdafiə İttifaqının qurulmasının əsl vaxtı olduğuna inanıram. Bəli, bilirəm ki, bu fikirdən narahat olanlar var. Amma bizi narahat edən şey təhlükəsizliyimizə təhdidlərdir. Üzv dövlətlər öz milli təhlükəsizlikləri və orduları üçün məsuliyyət daşıyacaqlar və NATO bizim kollektiv müdafiəmizin sütunu olaraq qalacaq".
AK rəhbəri qeyd edib ki, müdafiəyə ayırdıqları xərclər çox az və səmərəsizdir:
"Xarici xərclərimiz çox böyükdür, ona görə də biz vahid müdafiə bazarı yaratmalıyıq. Biz yüksək səviyyəli müdafiə imkanlarına daha çox sərmayə qoymalıyıq. Məsələn, təkcə hava məkanımızı qorumaq üçün deyil, həm də müdafiə məsələlərində Avropa birliyinin güclü simvolu kimi hərtərəfli hava hücumundan müdafiə sistemi – Avropa Hava Qalxanı yaratmalıyıq. Təhlükəsizlik təkcə xarici təhlükələrdən ibarət deyil. Kiber və hibrid təhlükələr artır. Mütəşəkkil cinayətkar şəbəkələr iqtisadiyyatımıza nüfuz edir; əksəriyyəti korrupsiyadan istifadə edir. Bunların qarşısı alınmalıdır".
Ursula fon der Lyayen onu da əlavə edib ki, xarici sərhədlərimizi qorumaq üçün daha çox işlər görülməlidir:
"Xüsusilə sərhəd hibrid hücumlar və təxribatların hədəfinə çevrilib.Rusiya Yəməndən olan miqrantları şimala doğru şirnikləndirir və onları qəsdən Finlandiya sərhədinə doğru itələyir. Biz həmişə nəzərə almalıyıq ki, üzv dövlətin sərhədi Avropa sərhədidir. Biz onları daha da gücləndirmək üçün əlimizdən gələni edəcəyik. Mən Avropanın sərhəd və sahil mühafizələrinin sayını üç dəfə artıraraq 30 minə çatdırmağı təklif edəcəyəm".
.
