"2016-cı ilin iyulun 15-də Türkiyə ən ağır günlərindən birini yaşayıb. Həmin gün dövlət çevrilişinə cəhd edildi, cavablarını da aldı. Millət birlikdə terrorçulara qarşı mübarizə apardı, küçələrə çıxdı. Bu, qəhrəmanlıqdır”.
Bunu Türkiyədə dövlət çevrilişinə cəhdin ikinci ildönümü ilə əlaqədar keçirilən mətbuat konfransında Türkiyənin Azərbaycandakı fövqəladə və səlahiyyətli səfiri Erkan Özaral deyib.
Diplomat xatırladıb ki, Türkiyə həmin gün 250 şəhid verib: "Bu cür hadisələr dərs oldu. Bunların bir daha təkrar olunmamasına çalışırıq. Fətullahçı Terror Təşkilatı dövləti ələ keçirməyə çalışdı. Amma buna nail ola bilmədilər. Onların cəhdləri qarşılıqsız qala bilməzdi”.
E.Özaral bildirib ki, Türkiyədə bu hadisəyə görə 661 nəfər ömürlük həbs edilib: "101 iş üzrə istintaq aparılır. Hüquqi dövlətdə bu cür addımların atılması normaldır. Buna kimsə kölgə sala bilməz. Bundan başqa, 180 min nəfər dövlət işlərindəki vəzifələridən azad edilib”.
Səfir vurğulayıb ki, bu terror təşkilatı əxlaqdan kənar bütün addımları atıb: "Türkiyədə terrora qarşı çox ciddi mübarizə aparılır. Türkiyədə bir daha belə hal baş verə bilməz. FETÖ ilə mübarizəni xarici ölkələrdə də aparırıq. Bu məqsədlə 30 ölkədə onların tədris mərkəzləri bağlanılıb.
O bildirib ki, bu məsələdə Azərbaycan Türkiyəyə dəstək verib: "Buna görə də Azərbaycan Prezidentinə, o cümlədən dövlət qurumlarının rəhbərlərinə təşəkkürümü bildirirəm. Birgə addımlarla Azərbaycanda da FETÖ-nün dayaqları məhv edildi”.
"Türkiyə ilə Azərbaycan iki dövlət, bir millətdir. Əlaqələrimizə əngəl olanları aramızdan təmizləməliyik”.
Bunu da Türkiyənin Azərbaycandakı fövqəladə və səlahiyyətli səfiri Erkan Özoral deyib.
Səfir bildirib ki, belə qüvvələrin ifşa edilməsi üçün birgə addımlar atılır.
Diplomat Gəncədə baş verən hadisələrə də münasibət bildirib: "Türkiyə olaraq Azərbaycana qarşı olan qüvvələrə qarşıyıq. Azərbaycanın bu istiqamətdə atacağı bütün addımları dəstəkləyirik. Sona qədər də belə olacaq. İnanırıq ki, günahkarlar layiqli cəzasını alacaq, bunun üçün nə lazımdırsa, edəcəyik”.
