“Xəstələrin həkim tövsiyəsi olmadan dərman vasitəsi istifadə etməsi təhlükəlidir”.
Bunu bu gün TƏBİB-in Dərman və tibb vasitələri departamentinin rəhbəri Elmin Quliyev “Dərman təhlükəsizliyi və farmakonəzarət” mövzusunda çıxışında bildirib.
E. Quliyev deyib ki, COVİD pandemiyası dövründə xəstələr stasionar şəraitdə də dərman qəbul edirlər: “Bu halda həkim nəzarəti olur və ciddi əlavə təsirlər müşahidə edilmir. Ancaq bəzən insanlar özləri antiviral, ineksion və digər dərman vasitələri qəbul edirlər. İneksion dərman vasitələrinin qəbulu hətta ölümə səbəb ola bilər. İnsanlar özbaşına dərman vasitələrinin qəbul edilməsindən çəkinməlidirlər”.
TƏBİB dərmanların çay və ya südlə qəbuluna münasibət bildirib
“Dərman vasitələrini düzgün dozada, istifadə təlimatına uyğun istifadə etmək vacibdir”.
Bunu bu gün TƏBİB-in Dərman və tibb vasitələri departamentinin rəhbəri Elmin Quliyev “Dərman təhlükəsizliyi və farmakonəzarət” mövzusunda çıxışında bildirib.
E. Quliyev deyib ki, dərman qəbulu zamanı yaşanan əlavə təsirləri bildirmək lazımdır: “Bu halda istər tibb işçiləri, istər pasiyentlərin özləri tərəfindən bu əlavə təsirlərin qarşısı zamanında alınır”.
TƏBİB-in departament rəhbəri qeyd edib ki, ağızla qəbul edilən dərman vasitələri su ilə qəbul edilməlidir: “Çox soyuq, ya da çox isti su ilə dərman qəbul etmək düzgün deyil. Belə dərmanları otaq temperaturunda bol su ilə qəbul etmək lazımdır. Dərmanları meyvə şirələri ilə qəbul etmək olmaz, çünki reaksiyaya girə bilərlər. Bəzi insanlar dərmanları çay və ya südlə qəbul edirlər, bu da arzuedilməzdir. Süd ilə antibiotik vasitələri qəbul etmək olmaz. Spirtli içkilərlə dərman vasitələrini qəbul etmək ümumiyyətlə, yolverilməzdir, ciddi təhlükə yaradır”.
E. Quliyev nəzərə çatdırıb ki, dərmanın susuz qəbul edilməsi də düzgün deyil: “Çünki su ilə dərman daha yaxşı sovrulur”.
.
