ABŞ Konqresinin Nümayəndələr Palatasının spikeri Nensi Pelosinin İrəvan səfərində birinci məqsəd Ermənistanı tamamilə Rusiyadan qoparmaq, KTMT və Avrasiya İqtisadi Birliyindən çıxarmaqdır və İrəvana dəstək sözü verməkdir.
Bunu APA-nın Moskva müxbirinə açıqlamasında Rusiya Siyasi Tədqiqatlar İnstitutunun direktoru, politoloq Sergey Markov deyib.
Politoloq bildirib ki, ikinci məqsəd isə Pelosinin ABŞ-da yaşayan erməniləri bu ilin noyabrında keçirilən seçkilərdə Demokrat Partiyasına tərəf çəkməyə cəhd etməsidir: “Rusiyada Pelosinin səfərinə Nikol Paşinyanın satqınlığı kimi baxırlar. Ona görə də, Azərbaycanla Ermənistan arasındakı münaqişədə neytral mövqe tutan Rusiya hiss edir ki, Paşinyan Moskvanı ABŞ və Fransaya tərəf getməklə şantaj edir. Moskva tərəfdən bunun cavabı ya Paşinyanın Rusiyayönümlü qüvvələr tərəfindən devrilməsi, ya da Moskvanın neytral mövqedən Azərbaycan tərəfə keçməsi ola bilər”.
Markovun fikrincə, Rusiya Azərbaycanın Qarabağ üzərində nəzarəti tam bərpa etməsinə, eləcə də Naxçıvanla Azərbaycanı birləşdirən Zəngəzur dəhlizinin silah gücü ilə açılmasında tərəf kimi çıxış edə bilər: “Ümumilikdə Paşinyan hakimiyyətinin hərəkətləri Rusiyada satqınlıq kimi qəbul edilir. O ki qaldı Ermənistanın KTMT-dən çıxacağı ilə bağlı rəsmi İrəvanın təhdidlərinə, əgər bu baş versə, hazırda sülhməramlıların nəzarəti altında olan ərazilər tez bir zamanda tamamilə Azərbaycanın nəzarətinə keçəcək”.
Rusiyalı siyasi ekspert Yevgeni Mixaylov Ermənistan rəhbərliyinin Rusiyaya açıq xəyanət siyasəti apardığını və bunun Ermənistan tərəfdən Azərbaycana qarşı ardı-arası kəsilməyən təxribatlar fonunda baş verdiyinə diqqət çəkib.
“Rəsmi İrəvanın əsas məqsədi Kollektiv Təhlükəsizlik Müqaviləsindən çıxmaqdır. Rusiya bunu yaxşı bilir. Məlum idi ki, Ermənistanın müdafiə naziri bir müddət əvvəl Vaşinqtonda, Dövlət Departamentində görüşlər keçirmişdi. Daha sonra isə Azərbaycan sərhədində təxribat baş verdi. Bütün bunlar bir zəncirin halqalarıdır. Rusiyanın sərhədləri boyu vəziyyəti gərginləşdirmək Vaşinqtonun əsas vəzifəsidir və bu effekti gücləndirmək üçün Nensi Pelosi Ermənistana göndərilib. Düşünürəm ki, Rusiya bundan nəticə çıxaracaq. Çünki Ermənistan rəhbərliyinin bu hərəkətləri tamamilə qəbuledilməzdir. Bu, birbaşa xəyanətdir. Ermənistan bu gün Rusiyadan çox asılıdır. Ona görə də, Moskva ilə əməkdaşlıqdan imtina Ermənistan üçün dövləti itirməklə nəticələnəcək. Ermənistanı kütləvi miqrasiya gözləyir. Rəsmi İrəvan Azərbaycan və Türkiyə ilə münasibətlər qurmaq əvəzinə, ölkəni uçuruma aparır”, - rusiyalı ekspert vurğulayıb.
.
