Bu il qlobal enerji sektoruna 2,4 trln. ABŞ dolları həcmində sərmayə yatırılacaq, bu da illik müqayisədə 8% artım deməkdir.
Beynəlxalq Enerji Agentliyinin (IEA) hesabatının verdiyi məlumata görə, artım əsasən təmiz enerjinin hesabına baş tutacaq.
Hesabatda qeyd olunub ki, artan investisiyalara baxmayaraq, bu, hazırki enerji böhranının bir çox aspektlərini həll etmək və daha təmiz və təhlükəsiz enerji gələcəyinə yol açmaq üçün kifayət qədər yetərli deyil.
"Biz hazırki qlobal enerji böhranını və ya iqlim böhranını görməməzlikdən gələ bilmərik, lakin yaxşı xəbər odur ki, onlar arasında seçim etmək lazım deyil - biz eyni zamanda hər ikisinin öhdəsindən gələ bilərik. Təmiz enerji keçidini sürətləndirmək üçün investisiyaların böyük artımı yeganə davamlı həlldir”, - IEA-nın icraçı direktoru Fatih Birol qeyd edib.
.
