“Sənət adamlarının sosial təminat məsələlərinin, eləcə də mənzil problemlərinin həlli Mədəniyyət Nazirliyinin imkanları xaricindədir.”

Bu barədə Mədəniyyət Nazirliyindən bildirilib.

Qeyd olunub ki, Əməkdar artist Novruz Qartal Azərbaycan Dövlət Akademik Musiqili Teatrında işləyir: “Onun səhhətində yaranan problemdən xəbərimiz var, teatr rəhbərliyi də lazımi diqqəti və dəstəyi göstərir. Mədəniyyət Nazirliyinin kollektivi adından dəyərli aktyorumuza Allahdan şəfa diləyirik. Biz uzun illər bu sahədə çalışan, zəhmət çəkən insanların əziyyətini imkan daxilində qiymətləndirməyə çalışırıq. Hazırda kirayədə yaşayan, səhhətində problem olan bir çox sənətçilərimiz var”.

Novruz Qartalın uzunillik fəaliyyəti dövlət tərəfindən layiqincə qiymətləndirildiyi diqqətə çatdırılıb: “O, 2013-cü ildə Respublikanın Əməkdar artisti fəxri adına layiq görülüb, 2015-2018-ci illərdə Prezident mükafatı alıb.”

Qeyd edək ki, Milli Məclisin bu gün keçirilən iclasında parlamentin Mədəniyyət komitəsinin sədri Qənirə Paşayeva Əməkdar artistin ev probleminin olduğunu deyib və əlaqədar qurumları bu məsələyə münasibət bildirməyə çağırıb.

.