ABŞ Yəməndə “Əl-Qaidə” terror təşkilatının iki terrorçusunu zərərsizləşdirib.
Bu barədə Səudiyyə Ərəbistanının Al Hadath telekanalı məlumat yayıb.
ABŞ Silahlı Qüvvələri pilotsuz uçuş aparatı vasitəsilə “Əl-Qaidə terror təşkilatının sahə komandirini və qruplaşmanın daha bir üzvünü Yəmənin Marib vilayətində məhv edib. Mənbələrin məlumatına görə, ABŞ şənbə axşamı Marib vilayətinin Əl-Vadi rayonunda “Əl-Qaidə”nin sahə komandiri Munir Badcli əl-Ahdalın (Abo əl-Xayca əl-Hədidi adı ilə tanınır) və onun adı açıqlanmayan müşahidəçisinin hərəkət etdiyi motosikletə pilotsuz aparatla zərbə endirib. Yəmənli jurnalist Muhəmməd bin Feysəlin sözlərinə görə, əl-Ahdal Yəməndə “Əl-Qaidə”nin əsas komandirlərindən biri hesab olunur.
Qeyd edək ki, əvvəllər ABŞ tərəfindən terror təşkilatının ən təhlükəli regional filialı kimi qiymətləndirilən “Əl-Qaidə Ərəbistan yarımadasında” qruplaşması, artıq on ildən çoxdur davam edən hökumət qüvvələri ilə “Ənsar Allah” hərəkatından olan husilər arasındakı münaqişə fonunda Yəməndə mövqelərini gücləndirib. Hazırda husilər respublikanın təxminən üçdə birini nəzarətdə saxlayır.
.
