İsrail Ordusu İranla mümkün müharibəyə hazırlıq vəziyyətinə gətirilib.
Bu barədə İsrail mediası məlumat yayıb.
Qeyd edilib ki, İslamabadda ABŞ-İran danışıqlarının uğursuzluqla nəticələnməsindən sonra İsrail Ordusunun Baş Qərargah rəisi general-leytenant Eyal Zamir ordunun yüksək hazırlıq vəziyyətinə keçirilməsi barədə əmr verib.
Baş Qərargah rəisi yaxın vaxtlarda İranla hərbi qarşıdurmanın yenidən başlama ehtimalına qarşı hazır olmağı tapşırıb.
İsrail Ordusu müharibə hazırlığı rejiminə keçib. Bütün bölmələrə yüksək hazırlıq səviyyəsini qorumaq, reaksiyanı sürətləndirmək və əməliyyat boşluqlarını aradan qaldırmaq tapşırılıb.
Eyni zamanda, Hərbi Kəşfiyyat İdarəsi İranda hədəf bazasının genişləndirilməsi üzərində işi sürətləndirib. Əsas diqqət raket sistemləri, buraxılış qurğuları və onları dəstəkləyən infrastruktur kimi hərbi obyektlərə yönəlib. Bildirilir ki, hədəflərin sürətlə yenilənməsi siyasi qərar qəbul ediləcəyi halda operativ zərbələrin həyata keçirilməsinə imkan yaradacaq.
İsrail Hərbi Hava Qüvvələri də mümkün zərbə variantlarını hazırlayır. Bu çərçivədə uzaqmənzilli imkanları, yüksək dəqiqliyi və davamlı əməliyyat qabiliyyətini birləşdirən genişmiqyaslı “zərbə paketləri” üzərində iş aparılır. Hazırlıqlara ilkin ssenarilərin məşqi və planlaşdırmadan icraya sürətli keçidin təmin edilməsi daxildir.
Müdafiə istiqamətində isə İsrail Ordusu hava hücumundan müdafiə sistemlərinin yerləşdirilməsini gücləndirir və eyni vaxtda bir neçə cəbhədən hücum ehtimalını nəzərə alan ssenarilərə hazırlaşır. Bu çərçivədə mülki müdafiə hazırlığı da yenilənir və bütün istiqamətlər üzrə təhlükəsizlik səviyyəsi artırılır.
.
