“Bu gün səhər saatlarında Ermənistan Silahlı Qüvvələrinin Azərbaycana qarşı törətdiyi təxribat nəticəsində həm mülki əhali, həm də hərbçilərimiz arasında itkilərimiz var. Bu, Ermənistanın faşist fəaliyyətini bir daha dünyaya göstərdi”.
Bu sözləri Prezident İlham Əliyev Təhlükəsizlik Şurasının bu gün keçirilən iclasında deyib.
Prezident bildirib ki, Müdafiə Nazirliyinə və aidiyyəti qurumlara real vəziyyətlə bağlı zəruri tapşırıqlar verilib:
“Ermənistanın təxribatına cavab olaraq Azərbaycan Ordusu genişmiqyaslı əks-hücum əməliyyatları həyata keçirir. Ermənistanın hərbi təxribatı uzun müddətdir ki, hazırlanan, planlı addımdır.
Bu, onu göstərir ki, Ermənistan Azərbaycana qarşı yeni müharibə başlatmaq niyyətindədir. Bu məsələ ilə bağlı mən son bir həftə ərzində mediada, BMT kürsüsündən çıxışlarımda qeyd etmişəm.
Bildirmişəm ki, onların qarşısı alınmalıdır. Onlar müharibəyə hazırlaşırlar. Bu gün xalqa müraciətimdə də ermənilərin çirkin addımları haqqında məlumat verdim.
Ermənilərin bu gün bir neçə istiqamətdən bizim mövqelərimizi, mülki əhalini atəşə tutması planlı şəkildə atılan addımdır. Dinc əhaliyə qarşı bu cür addım yalnız faşistlərə xas ola bilər. Onlardan fərqli olaraq, bizim başqalarının torpaqlarında gözümüz yoxdur. Biz öz torpaqlarımızı sonuna kimi müdafiə edəcəyik”.
İlham Əliyev işğaldan azad edilən kəndlərdən danışdı
“Bu gün səhər mən bütün cəbhəboyu bölgələrdən məlumat almışam. Azərbaycan vətəndaşları cəsarət göstərirlər, hər kəs öz yerindədir, ordumuza, dövlətimizə dəstək verməyə hazırdırlar və bunu edirlər”.
Bunu Təhlükəsizlik Şurasının iclasında Prezident İlham Əliyev deyib.
O bildirib ki, Azərbaycan Ordusu Ermənistanın təxribatına cavab olaraq əks-hücum əməliyyatları həyata keçirir.
“Deyə bilərəm ki, əməliyyat uğurla həyata keçirilir, Prezident Administrasiyasına, eyni zamanda, Müdafiə Nazirliyinə göstəriş verildi ki, əhali müntəzəm olaraq hadisələrin gedişatı ilə bağlı məlumatlandırılsın”, - deyə İlham Əliyev əlavə edib.
Prezident bildirib ki, uğurlu əks-hücum nəticəsində işğal altında olan bir neçə yaşayış məntəqəsi azad edilib.
“Bu münasibətlə bütün Azərbaycan xalqını təbrik edirəm. Bizim uğurlu əks-hücum əməliyyatımız işğala, ədalətsizliyə son qoyacaq”, - deyə İlham Əliyev söyləyib.
.
