Bir vaxtlar yolların bərbad olması səbəbi ilə Cəlilabad rayonunun ucqar kəndlərində nəqliyyat problemi yaşanırdı. Həmin kəndlər üzrə marşrut xətləri demək olar ki, yox səviyyəsində idi. Son illər dağ kəndlərinə gedən yollar əsaslı təmir olunsa da yenə bu problem aradan qalxmadı. Bu kəndlərin sakinləri yenə gündəlik nəqliyyatdan istifadə edə bilmir. Yeganə çıxış yolları rayon mərkəzinə taksi ilə gedib-qayıtmaqdır.
Hazırda Cəlilabadın 60-dan çox kəndinə marşrut xətləri işləyir. 20 kənddə isə hələ də marşrut problemi qalmaqdadır. Bu kəndlər arasında Cəngan və Təzəkənd kəndləri də var.
Hər iki yaşayış məntəqəsində yol infrastrukturu müasir standartlar səviyyəsində yenilənsə də yeni yola marşrut xətti buraxılmayıb. Hazırda sakinlər rayon mərkəzinə gedərkən əsasən taksi xidmətlərindən istifadə edirlər ki, bu da onlara baha başa gəlir. Yerli sakinlərin sözlərinə görə kənddə marşurut xətlərinin fəaliyyət göstərməməsi səbəbindən bəzən onlar yollarda saatlarla vaxt itirirlər.
Mövcud məsələdən Dövlət Avtomobil Nəqliyyat Xidmətinin Cəlilabad Regional Şöbəsi də xəbərdardır. Hər iki kəndin sakinləri tərəfindən bu problemlə bağlı yerli regional şöbəyə müraciət olunub. Nazim Musayevin sözlərinə görə digər kəndlərdə də yol təsərrüfatı tədricən yeniləndikcə yeni marşrut xətlərinin fəaliyyəti təmin olunacaq.
.
