Azərbaycan klubları üçün avrokubokların 2021/22 mövsümünə start verilib.
Apasport.az saytının məlumatına görə, qitə səhnəsinə çıxan ilk komandamız “Neftçi” olub.
Bakı klubu Çempionlar Liqasının I təsnifat mərhələsinin ilk oyununa çıxıb. Paytaxt təmsilçisi Gürcüstanda Tbilisi “Dinamo”sunun qonağı olub.
İki qonşu ölkənin flaqmanının duelində hesabı Azərbaycan çempionu açıb. Premyer Liqanın bombardiri kimi çempionluqda əvəzsiz pay sahibi olan Namiq Ələsgərov fərqlənib. Lakin ilk yarıdakı bu qoldan sonra müdafiəyə çəkilən “Neftçi” çox keçmədən topu qapısından çıxarıb.
İkinci hissənin əvvəlində Samir Abasovun yetirmələri yenidən hesabda önə keçib. Emin Mahmudovun ilk penalti zərbəsini qapıçı dəf etsə də, qayda pozuntusu səbəbindən kapitan 11 metrlik nöqtəyə təkrar yaxınlaşıb. O, dəqiq zərbə ilə komandasını hesabda irəli çıxarıb. Bu qol “Neftçi”yə 2:1 hesablı qələbə qazandırıb.
Qeyd edək ki, komandalar arasında cavab oyunu iyulun 14-də Bakıda keçiriləcək.
Çempionlar Liqası
I təsnifat mərhələsi
İlk oyun
7 iyul
20:00. “Dinamo” (Tblisi, Gürcüstan) – “Neftçi” (Azərbaycan) - 1:2
