Bərdədə polis əməkdaşı arvadını bıçaqlayıb-TƏFƏRRÜATI

Publika.az-ın kənd sakinlərindən əldə etdiyi məlumata görə, S.Məmmədovun hadisəni törətməsinin səbəbi ailə münaqişəsidir. S.Məmmədovun həyat yoldaşı Anjela Şükürova Bakı sakinidir. Onlar ailə qurandan sonra qadın yoldaşı ilə birlikdə kənddə yaşayıb, iki uşaqları var.

Sakinlər deyir ki, onlar S.Məmmədovun valideynləri ilə birlikdə yaşayır. Tez-tez ailədə münaqişə olurdu.

Bəzi iddialara görə, S.Məmmədovun başqa bir qadınla münasibəti olub, bu səbəbdən yoldaşı ilə yola getmirmiş. Hadisə baş verəndə isə onun içkili olduğu güman edilir.

İddialar arasında A.Şükürovanın başqa bir şəxslə münasibətinin olması fikirləri də var.

Hazırda Bərdə Mərkəzi Rayon Məxsətxanasında reanimasiya şöbəsində yatan A. Şükürovanın vəziyyətinin ağır olduğu deyilir. Xəstəxanadan Publika.az-a verilən məlumata görə, 1987-ci il təvəllüdü A.Şükürova ötən gün axşam 18:05 radələrində çoxsaylı yaralanma ilə şöbəyə yerləşdirilib. Onun döş qəfəsinin sol nahiyəsindən qarın boşluğuna keçən 6 kəsilmiş-deşilmiş yara olub. Həmçinin süd vəzi, boyun nayihəsi və sol çiynində də kəsilmiş yaralar olub. Bir neçə saat davam edən ağır əməliyyatdan sonra qadının həyatı xilas edilib. Xəstəxanadan bildirilib ki, qadının vəziyyəti orta ağır dəyərləndirilir. Bu gün səhər saatlarında müəyyən qədər özünə gəlib, polis artıq ifadəsini alıb.

Qeyd edək ki, Bərdə rayonu Əliyanlı kənd sakini Sevindik Şəmşir oğlu Məmmədov ötən gün həyat yoldaşına bıçaqla xəsarət yetirib. S. Məmmədov Yevlax Rayon Polis Şöbəsinin Dövlət Yol Polisi bölməsinin əməkdaşıdır.