Beynəlxalq Prokurorlar Assosiasiyasının üzv dövlətlərin hüquq-mühafizə orqanları arasında səmərəli əməkdaşlıq əlaqələrinin qurulması və daha da genişləndirilməsi indiki dövrdə mühüm əhəmiyyət daşıyır.
Bunu Baş prokuror Kamran Əliyev Beynəlxalq Prokurorlar Assosiasiyasının 29-cu İllik Konfransı və Ümumi Yığıncağı zamanı açılış nitqində deyib.
O, bu beynəlxalq tədbirin regional təhlükəsizlik və cinayətkarlığa qarşı mübarizədə mühüm əhəmiyyətini qeyd edib:
"Müstəqil dövlətçiliyin bərpasından sonrakı dövrdə prokurorluq orqanlarının ən mühüm cəhəti onun müstəqil dövlət strukturu kimi təşəkkül tapması, eləcə də üzərinə düşən vəzifələrini tam olaraq yeni siyasi plüralizm və bazar iqtisadiyyatı şəraitində, habelə insan hüquq və azadlıqlarına əsaslanan hüquqi dövlət və bilavasitə demokratik cəmiyyətin tələbləri ilə uzlaşdırması olub".
COP29-un Azərbaycanda keçirilməsi ölkəmizə böyük hörmətin təzahürüdür
Bakıda keçiriləcək BMT-nin İqlim Dəyişmələri üzrə Çərçivə Sazişinin Tərəflər Konfransının 29-cu Sessiyası (COP29) çərçivəsində Azərbaycan Baş Prokurorluğunun Birləşmiş Millətlər Təşkilatının Narkotiklər və Cinayətkarlıqla Mübarizə İdarəsi (UNODC) ilə birgə təşkilatçılığı ilə noyabrın 15-də “İqlim dəyişikliyi ilə mübarizədə hüquq-mühafizə orqanlarının səfərbər edilməsi” adlı yüksək səviyyəli plenar iclas təşkil olunacaq.
Bu fikirləri Bakıda Beynəlxalq Prokurorlar Assosiasiyasının 29-cu İllik Konfransı və Ümumi Yığıncağında Baş prokuror Kamran Əliyev deyib.
O, BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası - COP29-un Azərbaycanda keçirilməsi tarixi əhəmiyyətinə toxunub.
Kamran Əliyev bildirib ki, tədbirin Azərbaycanda keçirilməsi ölkəmizə olan böyük hörmət və etimadın, habelə Azərbaycanın milli, regional və qlobal səviyyədə ətraf mühitin qorunması, iqlim dəyişmələrinə qarşı mübarizə fəaliyyətinə töhfəsinin təqdir olunmasının aşkar təzahürüdür.
.
