Türkiyə polisi Avropaya qeyri-qanuni yollarla getmək istəyən 200 miqrantı saxlayıb.

Türkiyə KİV-i xəbər verir ki, miqrantlar Çorum şəhərində polis tərəfindən saxlanılan TIR-ın içində olub.

Maşının yük yerindən azərbaycanlı və əfqanlar olmaqla 200 nəfər düşürülüb. Polis hazırda TIR sürücüsünü axtarır. Hadisə yerindən qaçan miqrantlar isə bir müddət sonra saxlanılıb.

Məlumata görə, Avropaya qeyri-qanuni yollarla getmək istəyənlərin hər birindən 1000 dollar alınıb. Onların Azərbaycan paytaxtı Bakı şəhərində toplandığı bildirilir.



DGK miqrantların Bakıdan Avropaya qanunsuz daşınması barədə xəbəri təkzib edir

Bu gün bir sıra kütləvi informasiya vasitələrində Türkiyədə fəaliyyət göstərən media orqanlarına istinadən qonşu ölkənin Çorum əyalətinin Osmancıq bölgəsində polis tərəfindən yük yerində Avropaya mühacirət etmək istəyən miqrantların olduğu nəqliyyat vasitəsinin saxlanıldığı, nəqliyyat vasitəsinin qoşqusunda aşkar edilən Azərbaycan vətəndaşları və əfqanlardan ibarət 200-dən artıq miqrantın Bakıda pul müqabilində nəqliyyat vasitəsinə mindirilərək qeyri-qanuni yollarla Avropaya daşındığı barədə həqiqətə uyğun olmayan məlumatlar yayılıb. Bu barədə "APA-Economics"ə Dövlət Gömrük Komitəsinin (DGK) Mətbuat Xidmətindən məlumat verilib.

Məlumata əsasən, komitədə aparılan araşdırma zamanı məlum olub ki, yayılan xəbərə əlavə edilən videoda görüntüləri əksini tapan miqrantların daşındığı 34 DH 9435 dövlət nömrəli nişanlı nəqliyyat vasitəsi Azərbaycanın gömrük ərazisinə ümumiyyətlə daxil olmayıb: "Həmin nəqliyyat vasitəsinin 34 EL 322 dövlət nömrə nişanlı qoşqusu isə sadəcə 1 dəfə, 2010-cu ildə Azərbaycan ərazisində olub".

"Üstəlik hadisə ilə bağlı Türkiyədə fəaliyyət göstərən kütləvi informasiya vasitələrinin hazırladığı daha ətraflı reportajlarda jurnalistlərə müsahibə verən miqrantlar nəqliyyat vasitəsindəki insanların əfqan, tacik, türkmən və özbəklərdən ibarət olduğunu bildirir, xəbərdə Azərbaycan və ya azərbaycanlılardan ümumiyyətlə bəhs olunmur", - deyə açıqlamada vurğulanıb.
DGK bir daha media qurumları və nümayəndələrinə komitənin fəaliyyət sahələrinə aid olan məlumatların rəsmi mövqe öyrənməklə hazırlanmasını və yayımlanmasını tövsiyə edir.

.