Bakıda keçiriləcək taekvondo üzrə dünya çempionatında Paris-2024 Yay Olimpiya Oyunlarına lisenziya üçün reytinq xalları açıqlanıb.
Yenizaman Dünya Taekvondosunun (World Taekwondo) rəsmi saytına istinadən xəbər verir ki, qızıl medalçılar 140 reytinq xalı alacaqlar.
İkinci pillənin sahiblərinə 84, üçüncü yeri tutanlara 50,4 xal veriləcək. Turniri 4 və 5-ci sırada başa vuranlar 30,24 reytinq xalı qazanacaqlar. 6-9-cu yerləri bölüşdürənlər 21,17 xal, 10-17-ci pillələrdə qərarlaşanlar 14,82 xal əldə edəcəklər. 18-33-cü yeri tutanlar 10,37, yarışı 34-65-ci sırada bitirənlər isə 7,26 reytinq xalı götürəcəklər.
Mundialın idarə edəcək hakimlərin sayı və onlara ödəniləcək vəsaitin məbləği də bəlli olub. Yarışda ümumilikdə 70 beynəlxalq dərəcəli referi ədaləti qoruyacaq. Onların hər birinə gündəlik 150 ABŞ dolları (7 gün üçün 1 050 dollar) veriləcək. Bundan başqa, təşkilat komitəsi hakimlərin yalnız Bakıda qalmaq və yemək xərclərini qarşılayacaq. Ədalət təmsilçiləri gəliş-gediş üçün aviabiletləri özləri almalıdırlar.
Qeyd edək ki, dünya çempionatı Ümumdünya Taekvondo Federasiyasının 50 illiyinə təsadüf edəcəyindən yubiley Bakıda qeyd olunacaq. Əvvəlkilərdən fərqlənəcək mundiala 3000-dək qonağın gəlişi gözlənilir. Mayın 29-dan iyunun 4-dək təşkil olunacaq yarış Bakı Kristal Zalında baş tutacaq.
.
