Azərbaycanda 2023-2026-cı illərdə neft hasilatının tədricən azalacağı proqnozlaşdırılır.

Bu barədə "Azərbaycan Respublikasının 2023-cü il dövlət büdcəsi” layihəsində bildirilir.

Sənədə əsasən, 2026-cı ildə ölkədə 30 274,3 min ton neft hasil olunacağı proqnozlaşdırılır, bu da 2023-cü ilin proqnoz göstəricisi (31 222,3 min ton) ilə müqayisədə 3% azdır.

Proqnoza görə, 2024 və 2025-ci illərdə Azərbaycanda müvafiq olaraq 30 649,7 min ton və 30 695,4 min ton neft hasil olunacaq.

Qeyd etmək lazımdır ki, bu ilin yanvar-sentyabr aylarında ölkədə 24 493,4 min ton neft hasil edilib, bu da illik müqayisədə 5,3% azdır.

Xatırladaq ki, 2021-ci ildə Azərbaycanda 34 580,7 min ton neft hasil edilib, bu da 2020-ci ilin göstəricisi ilə müqayisədə 0,1% çoxdur.

Azərbaycanda qaz hasilatı 2024-cü ildə 49 mlrd. kubmetri ötəcək

Azərbaycanda 2024-cü ildə qaz hasilatının 2023-cü ilin proqnoz göstəricisi (46 761,6 mln. kubmetr) ilə müqayisədə 5,54% artacağı və 49 352,7 mln. kubmetrədək çatacağı, lakin gələn iki il ərzində tədricən azalacağı proqnozlaşdırılır.

Bu, “Azərbaycan Respublikasının 2023-cü il dövlət büdcəsi Zərfi”ndə əksini tapıb.

Sənədə əsasən, 2025 və 2026-cı illərdə Azərbaycanda müvafiq olaraq 49 107,2 mln. kubmetr və 48 035,6 mln. kubmetr qaz hasil olunacaq.

Proqnoza görə, 2024-cü ildə ölkədə 38 477,5 mln. kubmetr əmtəəlik qaz istehsal olunacaq, bu da 2023-ci ilin proqnoz göstəricisi (35 900,3 mln. kubmetr) ilə müqayisədə 7,2% çoxdur. Buna baxmayaraq, 2025-2026-cı illərdə əmtəəlik qazın istehsalı azalacaq və müvafiq olaraq 38 462 mln. kubmetr və 36 890 mln. kubmetr səviyyəsində olacaq.

Qeyd etmək lazımdır ki, bu ilin yanvar-sentyabr aylarında ölkədə 34 402,6 mln. kubmetr qaz hasil edilib, bunun da 25 681,2 mln. kubmetri əmtəəlik qazın payına düşüb, bu da illik müqayisədə müvafiq olaraq 8,5% və 9,8% artım deməkdir.

Xatırladaq ki, 2021-ci ildə Azərbaycanda 43 863,5 mln. kubmetr qaz hasil edilib, bunun da 32 573,8 mln. kubmetri əmtəəlik qazın payına düşüb, bu da illik müqayisədə müvafiq olaraq 18,1% və 23% çoxdur.

.