Bu ilin yanvar-iyun aylarında Azərbaycan ərazisindən keçən dəhlizlər çərçivəsində dəmir yolu və dəniz nəqliyyatı ilə yük daşımalarından 260 804,5 min gəlir əldə olunub, bu da illik müqayisədə 5,6% azalma deməkdir.

Bu barədə Dövlət Statistika Komitəsi xəbər verir.

Məlumata görə, hesabat dövründə Azərbaycan ərazisindən keçən dəhlizlər çərçivəsində dəmir yolu ilə yük daşımalarından gəlirlər 163 922,9 min manat səviyyəsində olub ki, bu da 2024-cü ilin müvafiq dövrünün göstəricisi ilə müqayisədə 9,1% azdır.

Qeyd olunur ki, dəniz nəqliyyatı üzrə yanvar-iyun aylarında daşımalar üzrə əldə edilən gəlirlər 96 881,6 min manat olub və 2024-cü ilin birinci yarısının göstəricisi ilə müqayisədə 1,1% artıb.

Bildirilir ki, ötən ilin birinci yarısında Azərbaycan ərazisindən keçən dəhlizlər çərçivəsində dəmir yolu və dəniz nəqliyyatı ilə yük daşımalarından 276 189,4 min gəlir əldə olunub, bunun da 180 319,8 min manatı dəmir yolunun, 95 869,6 min manatı isə dəniz ilə daşımaların payına düşüb.

Xatırladaq ki, 2025-ci ilin yanvar-iyun aylarında nəqliyyat dəhlizlərində dəmir yolu nəqliyyatı ilə 7120,1 min ton, dəniz nəqliyyatı ilə 3752,2 min ton və avtomobil nəqliyyatı ilə 5307,7 min ton yük daşınıb.

Hesabat dövründə Şərq-Qərb nəqliyyat dəhlizi ilə daşınmış yüklərin həcmi 8300,8 min ton, o cümlədən Avropa-Qafqaz-Asiya nəqliyyat dəhlizi ilə 4088,9 min ton, Şimal-Cənub nəqliyyat dəhlizi ilə 4690,5 min ton, Şimal-Qərb nəqliyyat dəhlizi ilə 2930,4 min ton, Cənub-Qərb nəqliyyat dəhlizi ilə daşınmış yüklərin həcmi isə 258,2 min ton təşkil edib.

Dəmir yolu nəqliyyatı ilə daşınmış yüklərin 45,8 faizini, avtomobil nəqliyyatı ilə daşınmış yüklərin 42,3 faizini, dəniz nəqliyyatı ilə daşınmış yüklərin 95,1 faizini tranzit yüklər təşkil edib.

.