"Daha çox müştəriyə qaz çatdırmaqla yanaşı, metan emissiyalarını azaltmaq üçün birlikdə çalışırıq".
Bunu Bakıda keçirilən Cənub Qaz Dəhlizi Məşvərət Şurası nazirlərinin 11-ci iclasın və Yaşıl Enerji Məşvərət Şurası nazirlərinin 3-cü iclası çərçivəsində Avropa Komissiyasının enerji məsələləri üzrə komissarı Dan Yorgensen bildirib.
"Ötən il COP29-da Azərbaycanın əldə etdiyi uğurların ardınca bu fürsəti dəyərləndirmək və enerji keçidini sürətləndirmək istəyirik. Bu, bərpa olunan enerji mənbələrinin üçqat artırılması və 2030-cu ilə qədər enerji səmərəliliyindəki qazancın ikiqat artırılması deməkdir. Eyni zamanda, enerji şəbəkələri, enerji saxlama paketləri və qlobal metan razılaşmalarının həyata keçirilməsi deməkdir. Bu fürsətdən istifadə edərək, ötən il ərzində metan emissiyalarına dair başladılan uğurlu işlərə görə, Azərbaycana təşəkkür etmək istəyirəm. Onun bu məsələdə liderliyi ələ alması ruhlandırıcıdır" - Dan Yorgensen qeyd edib.
O vurğulayıb ki, həm regional tərəfdaşlar, həm də Avropa İttifaqının biznes və investorları Azərbaycanın bərpa olunan enerji sektorunu inkişaf etdirməkdə maraq göstərir. Bu, regional əlaqələndirmə bazarı, institusional qurumlar və sənaye dəyər zənciri komandaları üçün böyük imkanlar yaradır.
"Bu kontekstdə, bu gün keçirilən plenar iclas çərçivəsində müvafiq nazirlərlə regionda yaşıl enerji dəhlizinin inkişafı məsələsini müzakirə etdik. Xüsusilə, bu gün səhər saatlarında Avropa İttifaqının külək enerjisi sənayesi nümayəndələri və Azərbaycan Bərpa Olunan Enerji Agentliyi ilə apardığımız müzakirə mənim üçün maraqlı oldu. Çünki Azərbaycan Xəzər dənizinin geniş külək enerjisi potensialını inkişaf etdirməyə çalışır" - Aİ-nin enerji məsələləri üzrə komissarı əlavə edib.
.
