:
RU   AZ
  • Font size:
  • Decrease
  • Reset
  • Increase

ADB ABŞ ilə Çin arasındakı "ticarət müharibəsi"nə dair mövqeyini açıqlayıb

Font

"ABŞ ilə Çin arasındakı "ticarət müharibəsi" dolların məzənnəsini yüksəldə bilər".

Bunu "Report”a Asiya İnkişaf Bankı (ADB - Asian Development Bank) makroiqtisadi təhlil və regional əməkdaşlıq departamentinin iqtisadçısı Donqhyun Park bildirib.

"Bütün dünyada əks-səda doğuran bu kimi böyük sarsıntılar hətta ABŞ-ın birbaşa iştirak etdiyi təqdirdə belə adətən dolların məzənnəsini yüksəldir. Elə ABŞ-da başlayan son dünya maliyyə böhranı da buna misaldır. Çünki belə iqtisadi sarsıntılar zamanı hamı dollar almağa başlayır. Dünyada ən əsas ehtiyat vasitəsi olan dolları istədiyin vaxt rahatca satmaq olar. Odur ki, ABŞ ilə Çin arasındakı ticarət müharibəsinin də dolların məzənnəsini qaldıracağını gözləyirik”, – ADB nümayəndəsi deyib.

O, bununla belə iqtisadi artımın qısa perspektivi baxımdan sözügedən ticarət müharibəsini Asiya ölkələri üçün ən böyük risk hesab etdiklərini diqqətə çatdırıb.

"Hələ bir neçə həftə bundan əvvəl bu müharibəni dayandırmaq üçün xeyli imkanlar vardı. Lakin ABŞ hökuməti Çin mallarına çox yüksək rüsumlar tətbiq etdi. ABŞ ilə Çin arasındakı bu ticarət qarşıdurması Asiyanın iqtisadi perspektivini sual altına qoyur. Bəzi inkişafda olan kövrək bazarlara qayıdan valyutanın volatilliyi də belə risk yaradır”, – ekspert vurğulayıb. 

D.Park Asiya iqtisadiyyatlarının adətən möhkəm bünövrələri sayəsində kənar sarsıntılardan qorunduqlarını qeyd edib.

Xatırladaq ki, bu ayın əvvəllərində ABŞ Prezidenti Donald Tramp idxal olunan 500 milyard dollarlıq Çin mallarına 25 faizlik rüsum tətbiq edəcəklərini açıqlamışdı. Ayın 10-da isə 200 milyard dollarlıq "made in China” idxalına 10 faizlik rüsum qüvvəyə minib. Ertəsi gün isə prezident Tramp qalan 300 milyard dollarlıq Çin mallarına da gömrük rüsumlarını qaldırmaq göstərişi verib. Cavab olaraq Çin hökuməti ABŞ-dan idxal etdikləri 60 milyard dollarlıq mallara iyunun 1-dən qüvvəyə minəcək 5 faizdən 25 faizədək rüsum tətbiq edib.