:
RU   AZ
  • Font size:
  • Decrease
  • Reset
  • Increase

Şahid: "Saleh Rüstəmov mənim vasitəmlə bir dəfəyə 175 min ABŞ dolları pul göndərdi"

Font

Bu gün Bakı Ağır Cinayətlər Məhkəməsində Saleh Məhərrəm oğlu Rüstəmov, Vidadi Valeh oğlu Rüstəmli, Aqil Əli oğlu Məhərrəmov, Babək Qəzənfər oğlu Həsənov və Ruslan Şamil oğlu Nəsirovun cinayət işi üzrə məhkəmə prosesi davam etdirilib.

Hakim Eldar İsmayılovun sədrliyi ilə keçirilən iclasda İslam Rəhimov, Natiq Kamalov və Vüsal Bayramov şahid qismində ifadə veriblər.

Məhkəmə iclasında Milli Şurasının sədri Cəmil Həsənli, keçmiş deputat Arzu Səmədbəyli, eləcə də KİV-lərin nümayəndələri iştirak ediblər.

Natiq Kamalov məhkəmədə ifadəsində göstərib ki, ticarət məqsədi ilə mütəmadi olaraq Rusiyaya gedib-gəlir, ayrı-ayrı şəxslərin Moskvadan Azərbaycana pul göndərilməsi məsələsini həll edir. 2016-cı ilin sonlarında Moskvada olanda Saleh Rüstəmov ona Bakıya 4000 ABŞ dolları göndərmək istədiyini, pulu Bakıda qardaşı oğlu Vidadi Rüstəmlinin götürəcəyini deyib. Pulu ondan götürdükdən sonra Vidadi Rüstəmlinin əlaqə vasitəsini qohumu Tural Mehdixanova göndərib. Vidadi Turalla Bakıda görüşərək 4000 ABŞ dollarını ondan götürüb. Bundan sonra dəfələrlə qeyd olunan qaydada Saleh Rüstəmov Moskvadan Bakıya bəzən 3000, bəzən isə 4000 ABŞ dolları göndərib. 2017-ci ilin ortalarında isə Saleh Rüstəmov onun vasitəsiylə bir dəfəyə 175.000 ABŞ dolları pul göndərib, həmin pulu da Vidadi Rüstəmli Bakıda Turaldan götürüb.

İslam Rəhimov ifadəsində göstərib ki, 2018-ci ilin mayın 10-da Mütəşəkkil Cinayətkarlıqla Mübarizə İdarəsinin əməkdaşlarının təklifi əsasında onlar tərəfindən keçirilən əməliyyat tədbirində hal şahidi qismində iştirak etməyə razılıq verib. Həmin tarixdə polis əməkdaşlarının dəvəti ilə onlar Nərimanov rayonunda yerləşən "Əlibaba" çay evinin qarşısına gəliblər. Bir neçə dəqiqə sonra ora ağ rəngli "Kia" markalı avtomobil gələrək çay evinin qarşısında dayanıb. Polis əməkdaşları sükan arxasından düşən Vidadi Rüstəmliyə yaxınlaşıb xidməti vəsiqələrini təqdim etdikdən sonra narkotiklə bağlı şübhəli bilindiyi üçün saxlanıldığını bildiriblər. Vidadi Rüstəmli şalvarının cibində bir büküm heroini, sonra isə idarə etdiyi avtomobilin qoltuqaltından iki ədəd selofan bükümlərdə maddələri çıxarıb polislərə təqdim edib.

Vüsal Bayramov isə məhkəmədə dindirilərkən bildirdi ki, AXCP-ninüzvü Aqil Məhərrəmovu dostu Yusif vasitəsilə tanıyıb. Bir dəfə Aqil ona telefonla zəng edib, həmin gün işi olduğuna görə onun əvəzinə "Gənclik" metrostansiyasında bir nəfərlə görüşməyini və göndərilən pulu götürüb ona verməyini xahiş edib. O da işdən çıxdıqdan sonra Atatürk parkının yaxınlığında bir nəfər oğlanla görüşüb 500 ABŞ dolları məbləğində pulu qəbul edib Aqilə verib.

Təqsirləndirilən şəxs Aqil Məhərrəmov ilkin ifadələrində faktiki qanunsuz sahibkarlıq və cinayət yolu ilə əldə edilən pul vəsaitlərinin leqallaşdırılması əməllərini törətməklə üzvü olduğu siyasi qurumun fəaliyyətini qeyri-qanuni maliyyələşdirdiyini etiraf edib.

Məhkəmənin növbəti iclası fevralın 5-nə təyin edilib.