:
RU   AZ
  • Font size:
  • Decrease
  • Reset
  • Increase

Kim ki yüz il yaşamırsa... - Tamahınıza istefa, mədənizə azadlıq verin...

Font

Müşahidə etsək şahidi olarıq ki, bir çox insanlar qidalanarkən tələskənliyə yol verir. Hələ bu azmış kimi yemək yedikdən sonra tez-tələsik bir fincan çay içməyi də unutmurlar. Bu cür tələskənlik, qidaları bir-birinə qarışdırmaq hətta sağlam durumda olan insanlar üçün də narahatlıq yaradır. Və bu məsələdə ən çox əziyyət çəkən orqan mədə olur.

Modern.az saytı sağlamlıqla bağlı növbəti yazıda bu problemə toxunur.

Bəzən ən keyfiyyətli, sağlamlıq üçün faydalı olan qida məhsullarının qəbulundan sonra mədədə həzm problemi, ağırlıq yaranır. Təbii ki, istifadə olunan ərzaqların keyfiyyətinə tam əmin olduqdan sonra bu problemin yaranması ciddi narahatlıq doğurur və onun həlli üçün insanlar son çıxış yolunu apteklərə üz tutmaqda görürlər. Ancaq aptekə tələsməzdən əvvəl bu problemin yaranma səbəbini aramaq və onu aradan qaldırmaq lazımdır.

Mədədə ciddi bir xəstəlik yoxdursa bu problem adətən çox yeməkdən, ayrı-ayrı qida məhsullarını qarışdırmaqdan, qidalanarkən tələskənliyə yol verməkdən və düzgün qidalanmamaqdan yaranır. Belə ki, qida məhsullarının həzmi üçün mədəyə müəyyən bir vaxt lazımdır. Aşağıdakı siyahıda qidaların həzmi üçün sərf olunan vaxtı təqdim edirik:

Meyvə şirələri - 15-20 dəqiqə
Tərəvəz şirələri – 20-25 dəqiqə
Qarpız – 20 dəqiqə
Yemiş – 30 dəqiqə
Çiy tərəvəz – 30-40 dəqiqə
Alma, armud, ərik – 40-45 dəqiqə
Kələm, balqabaq, qarğıdalı – 45-50 dəqiqə
Düyü və qarabaşaq sıyıqları – 2 saat
Süd məhsulları – 2 saat
Yumurta – 45-50 dəqiqə
Balıq – 1 saat
Quş əti – 2-3 saat
Dana əti – 4 saat
Qoyun əti – 4-5 saat
Donuz əti ( o cümlədən donuz ətindən hazırlanmış məhsullar) – 5-6 saat

Əgər insan nahar yeməyində qoyun ətindən hazırlanmış xörək yeyirsə demək onun mədədə həzmi üçün ən azı 5 saat vaxt lazımdır. Ancaq çoxları bu həzm prosesi üçün lazım olan vaxtı gözləmədən, yeməkdən dərhal sonra, yağlı bir tort parçası ilə çay içirsə, və yaxid bir xörəklə kifayətlənməyib üstündən digər bir ət məhsulundan hazırlanmış xörək də yeyirsə həmin insan mədəsindən deyil, özündən, bir az da qabarıq ifadə etsək tamahından şikayətlənməlidir.

İmkan verilməlidir ki, mədədə həzm prosesi, mənimsənmə başa çatsın, mədə boşalsın. Və yalnız bundan sonra növbəti qida qəbuluna yol vermək olar. Əslində buna riayət etmək bir o qədər də çətin deyil. Cəmisi bir neçə gün insan öz tamahına sahib çıxa bilsə sonrakı günlərdə buna çox rahatlıqla uyğunlaşacaq və özünü həm artıq çəkidən, həm də mədə peoblemlərindən azad etmiş olacaq.

Sağlam olmaq istəyirsinizsə tamahınıza istefa, mədənizə azadlıq verin.