ABŞ və Fransa özləri Qarabağ münaqişəsinin həlli ilə bağlı ATƏT-in Minsk qrupunun “üçlü” işini dayandırıb.
APA “Sputnik Armenia”ya xəbər verir ki, bu barədə Rusiya Xarici İşlər Nazirliyinin rəsmisi Mariya Zaxarova Moskva, Paris və Vaşinqtonun Qarabağ məsələsi ilə bağlı nə üçün birgə çalışa bilməməsinə dair suala cavabında deyib.
“XİN başçısı Sergey Lavrov o cümlədən, ATƏT-in Minsk qrupunun fəaliyyətinə öz qiymətini verib. Vaşinqton və Paris həmsədrlər olduqları halda, uydurma səbəblərlə bu ilin fevralında Moskva ilə əməkdaşlıqdan imtina ediblər. Onlar bununla həm də ATƏT-in Minsk qrupunu da “basdırıblar”, - deyə Zaxarova deyib.
O, Cənubi Qafqazda təhlükəsizlik və sabitliyə dair Cenevrə diskussiyalarının da Qərblə Rusiya arasında kooperasiyanın pozulmasına dair nümunə olduğunu deyib. Mariya Zaxarova danışıqların 56-cı raundu yalnız 9 aylıq fasilədən sonra baş tutub və növbəti raund dekabr ayına planlaşdırılsa da, 2023-cü ilin fevralına qədər təxirə salınıb.
Rusiya XİN rəsmisi Ermənistandakı Avropa İttifaqının müşahidə qrupunun müddətinin uzadılmasını da şərh edib.
O, rəsmi Brüsselin hər vəchlə Azərbaycan və Ermənistan arasında normallaşma prosesinə qoşulmağa çalışdığını deyib.
“Onlar bunu sırf regionda yerləşmək və Rusiyanı bölgədən sıxışdırıb çıxarmaq üçün edir. Bu onların arzusudur. Biz buna münasibətimizi ifadə etmişik”, - Zaxarova brifinqdə deyib.
XİN rəsmisi məsələ ilə bağlı Rusiyanın həm Ermənistan, həm də Azərbaycanla təmasda olduğunu və Aİ-nin Ermənistandakı müşahidə qrupunun mandatının uzadılacağı halda bununla bağlı əlavə şərh verəcəklərini deyib.
.
